Бал ҡорто, уның бал йыйыуы (йомаҡтар)

1. Бер байҙың бар баҡсаһы,
   Баҡсаһында мунсаһы.
   Мунсаһына һыу ташый
   Нескә билле бисәһе.
2. Беҙләй ҙә беҙләй,
   Бигерәк йәне түҙмәй,
   Гел тәмлене эҙләй.
3. Яр аҫтында мунсаһы,
   Яр өҫтөндә булһасы!
   Йүгерә-йүгерә һыу ташый
   Нәҙек билле мәрйәһе.
4. Гөлбаҡсала бер мунса,
   Шул мунсаға һыу ташый
   Нескә билле Гөлниса.
5. Нәҙек билле мәрйә
   Йүгерә-йүгерә һыу ташый.
6. Йомро янбашлы мәрйә
   Йүгереп-йүгереп һыу ташый.
7. Баҡсалағы мунсала
   Нескә билле бер еңгә.
8. Ояһында беҙе бар,
   Бөҙрә сәсле ҡыҙы бар,
   Ите хәрәм, һурпаһы хәләл,
   Шул ни булыр? Белеп ал!