Икмәк, икмәк бешереү (йомаҡтар)

1. Йомро башлы түрәләр
   Түр башына менәләр.
2. Аҫты ҡыҙыл ғәләмәт,
   Өҫтө ҡыҙыл ғәләмәт,
   Алдым да һалдым,
   Һөйәнем дә ҡуйҙым.
3. Алдыңда булһа — моңайтмаҫ.
4. Үткер бысаҡ алалар,
   Яралар ҙа һалалар.
5. Бысаҡ алалар ҙа бауырымды теләләр.
6. Таяҡ менән туҡмайҙар,
   Ут менән яндыралар,
   Бысаҡ менән киҫәләр,
   Мине яратһындар өсөн,
   Шулай интектерәләр.
7. Туҡмап-туҡмап өйгә индерҙем,
   Маҡтап-маҡтап тышҡа сығарҙым.
8. Түп-түңәрәк,
   Торған ере түбәрәк,
   Кәрәк ере күберәк.
9. Үҙе йәнһеҙ,
   Унһыҙ донъя һанһыҙ.
10. Үҙе түңәрәк,
    Эсе тулы күҙәнәк.
    Әскелтем-сөскөлтөм,
    Бөтә нәмәнән ҡәҙерлерәк.
11. Күперҙе, күперҙе,
    Өйгә инен ултырҙы.
    Сыҡты ла сапты,
    Үткер ҡылысҡа ҡапты.
12. Киҫәм-киҫәм — ҡаны юҡ,
    Уны белмәгән кешенең һаны юҡ.
13. Сөсө түгел — әскелтем,
    Телгеләнгән һыныҡлы,
    Барынан да туҡлыҡлы.
14. Ҡырҡтылар мине,
    Һуҡтылар мине,
    Тунап-тунап бөттөләр мине,
    Ыуып-ыуып өф иттеләр,
    Тәгәрләтеп артыма типтеләр —
    Барыбер үҙемдекен иттем:
    Алдарына килеп ултырҙым.