Ҡыҫыр аш

Ҡыҫыр аш — эс майы менән ярманан әҙерләнә.

Ингредиенттар

• Һыу — 400—450 г
• эс майы — 30-40 г
• башлы һуған — 25-30 г
• тары ярмаһы — 40 г
• картуф — 100—150 г
• ҡатыҡ йәки ҡорот — 20-30 г
• тоҙ һәм борос сама менән

Әҙерләү ысулы

Эс майын (йылҡы, һыйыр малы, тауыҡ, ҡаҙ һ.б.) һалҡын һыуҙа йыуып, ваҡлап турағас, тәрән табаға һалып, утҡа иретергә ҡуйырға кәрәк.

Уға туралған һуған ҡушып, болғай-болғай ҡыҙҙырырға.

Май иреп бөткәс, уны һуғаны менән бергә кәстрүлгә ҡайнар һыуға бушаталар һәм таҙартып йыуылған тары өҫтәп, 10-15 минут бешерәләр.

Аҙаҡ ваҡлап туралған картуф, тоҙ һәм тәмләткестәр өҫтәп, аш өлгөргәнгә саҡлы бешерәләр.

Табынға ҡуйыр алдынан ашты ҡорот йәки ҡатыҡ менән тәмләндереп бирәләр.

Был ашты борсаҡ йәки башҡа төрлө ярма менән дә әҙерләйҙәр.