Ҡыҫыр туҡмас

Ҡыҫыр туҡмас, йәғни итһеҙ туҡмас. Туҡлыҡлы һәм шул уҡ ваҡытта диетик аш. Башҡорттар элек-электән күберәк яҙ, йәй айҙарында бешереп ашағандар.

Алырға

• бер ҡуш ус он
• ике йомортҡа
• бер ҡалаҡ һөт
• бер сынаяҡ йылымыс һыу
• ирегән һары май, ҡорот

Әҙерләү

Тәүҙә онға бер йомортҡа һытып, йылымыс һыу менән ҡамыр баҫып алабыҙ. Йәйеп киптереп туҡмас ҡырҡабыҙ. Өс литрҙан ашыуыраҡ һыу алып, ҡайнатырға ҡуябыҙ. Һыу ҡайнап сыҡҡас, бер аш ҡалағындай ирегән һары май, кәрәгенсә тоҙ һалып ебәрәбеҙ ҙә артынса туҡмасты төшөрәбеҙ. Бер йомортҡаны бер ҡалаҡ һөткә һытып, ныҡ итеп туҡып алабыҙ. Туҡмас бешер алдынан, ашты болғай-болғай, был шыйыҡсаны яйлап ҡына ҡоябыҙ. Йомортҡа тиҙ генә бешә. Ашты ҡоротлап, өҫтәп һары май һалып ашарға кәрәк. Ҡорот урынына ҡатыҡ туҡып та һалалар. Һыуған мотлаҡ түгел, әгәр ҙә яратһағыҙ, йәшел һыуған турарға мөмкин.